Kartat, sot skadon afati për personat pa pasaportë

Të gjithë shtetasit pa pasaportë kanë afat deri sot në orën 22.00 për të aplikuar për kartat e identitetit.

Ministria e Brendshme e Shqipërisë në një njoftim për shtyp sqaroi këto ditë se zyrat e gjendjeve civile do të qëndrojnë hapur deri në orën 22:00 të së hënës dhe të gjithë ata persona që do zbatojnë këtë afat do të kenë mundësi për tu pajisur me karta edhe për të votuar ne 28 qershor.

Zëdhënësi i Ministrisë së Brendshme, Fatmir Konja, deklaroi se ky është shansi i fundit për shtetasit pa pasaportë ndërkohë që ende nuk dihet se çfarë do të ndodhë me atë kategori qytetarësh që edhe sot për arsye të ndryshme nuk do të aplikojnë dot.

Procesi i aplikimit dhe pajisjes me kartat e identitetit vazhdon të jetë çështja më e debatuar mes forcave politikë në këtë proces zgjedhor.

Sipas të dhënave zyrtare një milionë e 354 mijë shtetas , kanë aplikuar për letërnjoftimin elektronik, ndërkohë që janë prodhuar 1 milion e 253 mije të tillë, prej të cilave 932 mije e 500 të tërhequra nga qytetarët shqiptarë.