Lirohet Agim Çeku

Gjykata bullgare e qarkut në Kyustendil ka vendosur të enjten lirimin e ish-kryeministrit të Kosovës, Agim Çeku. Lajmi është bërë i ditur nga agjencia AFP dhe Fokus dhe konfirmohet edhe nga zëdhënësja e Ministrisë së Punëve të Jashtme të Kosovës, Albana Beqiri.
“Agim Çeku është liruar nga paraburgimi dhe shumë shpejt pritet të kthehet në Kosovë”, ka thënë Beqiri për "Express".

"Nuk jam shtetas serb dhe kurrë nuk do të jem. Serbia nuk mund të kërkojë ekstradimin e shtetasve të huaj", ka thënë ish-kryeministri i Kosovës para gjykatës.

Po të enjten, gjykata në Kystendil të Bullgarisë, shtyu shqyrtimin e kërkesës për caktimin e paraburgimit prej 40 ditësh për ish kryeministrin kosovar, Agim Çeku, arrestuar dy ditë më parë.

Për shtyrjen e seancës shkroi agjencia bullgare e lajmeve "Fokus", e cila njoftoi se shtyrja e shqyrtimit është kërkuar gjykatësja kujdestare Sonja Kocova.

Të enjten, avokatët e Agim Çekut kanë sjellë si dëshmi letrën e kryeministrit të Kosovës Hashim Thaçi me të cilën dëshmohet se ish-kryeministri i Kosovës ka status diplomatik.

Një tjetër letër e paraqitur në seancë ka qenë edhe ajo e Kombeve të Bashkuara, në të cilën thuhet se i arrestuari është nën kompetencat e misionit të Kombeve të Bashkuara.

Dëshmia e tretë e paraqitur është letra e kryesuesit të Komitetit për politikë të jashtme Solomon Pasi, i cili pohon se Çeku ka pasur ftesë zyrtare për të vizituar Bullgarinë. /Shekulli/Telegrafi/