Thaçi: Po përgatitemi për liberalizim të vizave

Në kuadër të procesit të integrimit evropian, institucionet e Kosovës janë duke i bërë të gjitha përgatitjet e duhura, që me mbështetjen e Komisionit Evropian, edhe Kosova të jetë pjesë aktive e procesit të liberalizimit të vizave.

Kështu ka thënë kryeministrit Hashim Thaçi gjatë një takimi që zhvilloi sot me drejtorin për Ballkanin Perëndimor në Drejtorinë e Përgjithshme për Zgjerim të KE-së, Pierre Mirel.

“Institucionet e Republikës së Kosovës janë duke i bërë të gjitha përgatitjet e duhura, që me mbështetjen e Komisionit Evropian, edhe Kosova të jetë pjesë aktive e procesit të liberalizimit të vizave”, tha kryeministri Thaçi.

Sipas një komunikate shtypi të lëshuar pas takimit nga Zyra e Kryeministrit, Thaçi dhe Mirel e vlerësuan të frytshëm takimin e XVI-të të Mekanizmit Përcjellës të Stabilizim Asociimit, duke potencuar të arriturat dhe sfidat qe dalin nga ky proces i rëndësishëm për Kosovën.

Në takim u diskutua për Raportin e Progresit për vitin 2009 dhe për procesin e Studimit të Fizibilitetit, raporte këto që pritet të publikohen nga Komisioni Evropian në vjeshtën e këtij viti.

Nga ana e tij, drejtori i Përgjithshëm për Zgjerim i Komisionit Evropian, Pierre Mirel, thuhet se e ka përshëndetur bashkëpunimin me institucionet e Kosovës dhe u zotua që Kosova do të vazhdojë të jetë pjesë e rëndësishme e angazhimeve evropiane në rajonin e Ballkanit Perëndimor

» Thaçi: Serbia ka përgjegjësi historike